「情像雨點，似斷難斷，越是去想更是凌亂……」

係咪同風濕好似呢？若你試過風濕，你就明白風濕有幾咁纏綿難癒。每逢陰天就準時探你，唔會好難受，但又趕極唔走（像極了愛情？）。這就是濕邪的特性。好，我們又看另一例子。

「來又如風，離又如風，問世事通通不過是場夢……」

你未必試過情場上的人來人往，但這種來去匆匆的感覺你都一定經歷過，感冒、偶發皮膚敏感、眼皮跳、食蝦發敏感，風特性好動，所以你明白中醫並非無中生有，而是將症狀歸納概括為風的特性，所以感冒多為風寒風熱、皮膚敏感多叫風疹。當然凡事有例外，在此不詳述。

假若夕爺將歌詞改做來又如濕、離又如濕？一定好唔啱feel。皆因萬事萬物有其特性，火令人熱、寒令人凍、燥令人乾、熱脹冷縮、濕者纏綿。人屬自然，所以你越細心觀察自然，你就越發現人體的狀況其實跟自然相似。

你有冇試過，天氣凍、飲得多凍嘢會肚痛、經痛？之後用個暖包敷吓會舒服啲。不就是熱脹冷縮？

水向下流，所以你多數見水腫都係由腳先起。當然都有人先上肢浮腫，咁係因為水被風吹起，所以古人就會將之形容　為風水（金匱要略）。

對我而言，我反對人們說中醫是迷信，相反它就是自然科學，其實合理得很。若你更細心觀察自然，你就會更發現古人的智慧。

聽多首歌作結。「各種空虛冷冷冷……」你好難想像各種空虛熱熱熱……因為冷屬陰，熱屬陽。一個人好動你會說他熱情，而非冷情。由此由症狀、情緒到性格，五行之道其實包羅萬有。學中醫，就係學世界萬物變幻的道理。

你仲諗唔諗到邊啲關於五行的歌詞？諗到不妨留言分享。